Shkruan: Prof. Emin Behrami
Në fund të këtij Ramazani Muftiu i Luginës së Preshevës, Nexhmedin ef. Saqipi, i cili njëherit është edhe zëvendësreis i Rijasetit të Bashkësisë Islame në Serbi, ka apeluar tek institucionet më të larta në Kosovë, që t’ua mundësojnë besimtarëve myslimanë faljen e Namazit të Fitër Bajramit, ashtu siç bëjnë vëllezërit e tyre në Sanxhak dhe Luginë të Preshevës. Pastaj vazhdon të thotë: “në Luginë të Preshevës, të gjitha xhamitë janë të hapura, për t’i kryer ceremonitë fetare me disa reduktime për myslimanët, kudo qofshin ata, madje edhe përtej kufirit, duke llogaritur edhe Myftiun Naim Tërnava të vijnë e ta falin Namazin e Fitër Bajramit në Luginë të Preshevës”.
MUFTIU SAQIPI E INJORON KEQ MUFTIUN TËRNAVA
Nga leximi sipërfaqësor i ftesës së këtij muftiu drejtuar Muftiut Ternava mund të krijohet bindja se ai është treguar shumë i hapur dhe zemërgjërë ndaj Muftiut tonë, sa për të bashkëpunuar me të edhe në rrethanat më delikate e më të rënda nëpër të cilat po kalon rajoni ynë, madje mbarë njerëzimi në rruzullin tokësor, për shkak të Pandemisë Covid 19.
Mirëpo në fakt mesazhi i tij drejtuar Tërnavës, nëse lexohet në mes rreshtash, ka përmbajtje injoruese dhe skajshmërisht nënçmuese ndaj tij, të cilën mund ta kuptojnë vetëm ata që, në njërën anë, e njohin thellësisht përmbajtjen kontradiktore të Kushtetutës së BIRK-ut dhe, në anën tjetër, e njohin edhe mentalitetin e ulët,mendjemadhësinë dhe synimet despotike të Tërnavës për të udhëhequr kundërligjshëm edhe të tjerët që janë jashtë territorit të Republikës së Kosovës.
MUFTIU I PRESHEVËS E NJEH MIRË PËRMBAJTJEN KONTRADIKTORE DHE TË PAZBATUESHME TË KUSHTETUTËS SË BIRK-ut.
Muftiu i Luginës së Preshevës, Nexhmedin ef. Saqipi e di mirë se Kushtetuta e BIRK-ut, në nenin 1.8., nën juridiksionin e saj e përfshinë edhe Rajonin e Preshevës, të cilin e përbëjnë Këshillat e BI-së në Preshevë, Bujanoc dhe Medvexhë, prandaj dhe në mënyrë injoruese Tërnavës i kërkon sqarime se përse atëherë nuk po e shtrinë pushtetin e tij edhe atje dhe përse ka lejuar që ky rajon të përjashtohet nga moszbatimi i udhëzimit detyrues të Kryesisë së BIRK-ut për moshapjen e xhamive, për shkak të Covid 19, nëse realisht rajoni në fjalë udhëheqet nga ai?!
Sikur që Muftiu Saqipi e di shumë mirë se edhe neni 2.1. i kësaj Kushtetute parasheh se BIRK-u vepron, ndër të tjera, edhe në bazë të ligjeve të Republikës së Kosovës, “duke i zbatuar ato” edhe jashtë territorit të shtetit tonë, d.m.th. edhe brenda territorit të Republikës së Serbisë, prandaj, nëse është kështu, ai i kërkon Tërnavës, me një gjuhë injoruese, se përse atëherë edhe në këtë territor nuk zbatohen udhëzimet dhe rekomandimet e Institutit Kombëtar të Shëndetit Publik në Kosovë sa për t’u mbrojtur nga Pandemia Covid 19, siç pretendon rrejshëm Kushtetuta e BIRK-ut dhe Muftiu i saj, Naim Tërnava?!
Mesazhi I Muftiut Saqipi për Muftiun Tërnava mund të interpretohet kështu: MUFTI TËRNAVA, ADMINISTROJI PUNËT VETËM NË SHTËPINË TËNDE, KURSE NEVE NA LË REHAT NË SHTËPINË TONË, NË TË KUNDËRTËN, OSE ZBATOJI VENDIMET TUAJA DHE TË ORGANEVE KOMPETENTE TË REPUBLIKËS SË KOSOVËS EDHE NË PRESHEVË, OSE MOS KRIJO PËRÇARJE TE KOMUNITETI YNË?!
MUFTIUT TËRNAVA I INTERESON VETËM VJELJA E SADEKATU ELFITRIT, ZEKATIT DHE NDIHMAVE TJERA MATERIALE NGA MUSLIMANËT E PRESHEVËS
Nëse Tërnava nuk ka mundësi faktike që në territorin e Republikës së Sërbisë, më konkretisht në Rajonin e Preshevës t’i zbatojë vendimet e veta dhe të shtetit të Republikës së Kosovës, siç parasheh Kushtetuta e BIRK-ut , atëherë së paku të mos krijojë përçarje në atë komunitet, duke hequr dorë edhe nga mbledhja e sadekatu elflitrit, zekatit dhe ndihmave tjera vullnetare nga muslimanët e kësaj hapësire. Interesimi i Muftiut Tërnava vetëm për tubimin e të mirave materiale nga këta muslimanë, pa qenë në krahun e tyre edhe në momentet më dramatike që ata po kalojnë, sikur të gjithë të tjerët, është shpërfaqje e një hipokrizie të llojit të veçantë nga ana e tij. Keq është kjo, shumë keq dhe marri e madhe njëkohësisht! Vazhdon.